Хүүхдийг цэцэрлэгт дасгах тоглоомууд
Тойргоор нийтээрээ тоглох тоглоомууд үргэлж хөгжилтэй байдаг тул хүүхдүүдэд их таалагддаг. Энэ төрлийн тоглоомын давуу тал нь ангийн нийт хүүхэд оролцох боломжтой тул хэн ч орхигдсон мэдрэмж авдаггүй. Тойргоор тоглох тоглоомууд нь өөртөө итгэлгүй, ичимхий, эсвэл шинэ хүүхэд ангийн хүүхдүүдэд дасаж байр сууриа хурдан олоход нэн тустай. Урт амралтын дараа Та хүүхдүүдээ дараах тоглоомоор тоглуулаад үзээрэй.
Энэ бөмбөг бол ... [1]
Багш хүүхдүүдтэйгээ гадаа зугаалгаар гарахдаа нэг бөмбөг авч гарна. Хүүхдүүд том тойрог болон зогсоно. Багш бөмбөгийг дээш нь шидэхдээ аль нэг хүүхдэд хандан, “Энэ бөмбөг бол Батбаярынх” гэх мэтээр тухайн хүүхдийг нэрлэнэ. Нэрлэсэн хүүхэд бөмбөгийг барьж авна. Томхон хүүхэд бол бөмбөгийг барьж аваад, багш руу буцааж шиднэ, бага насныхан бол бөмбөгийг багшид аваачиж өгнө. Багш өөр нэг хүүхдийг нэрлэж бөмбөгийг дээш шидэж, тоглоом үргэлжилнэ. Энэ тоглоомоор хүүхдүүд бие биеийнхээ нэрийг мэддэг болно.
Хувилбар:
Хүүхдүүд нэгнийхээ нэрийг мэддэг болсон үед бөмбөг барьж авсан хүүхэд өөр нэг хүүхдийг нэрлэж бөмбөгөө дээш шиднэ.
Тойргийн эргэн тойронд [1]
Хүүхдүүд тойргоор зогсоно. Багш нэг хүүхэдтэй хамт тойргийн гадна талаар тойрч алхана. Багштай хамт яваа хүүхэд алхах явцдаа аль нэг хүүхдийн мөрөн дээр тогшиж, “Чи бидэнтэй хамт явах уу?” гэж асууна. Ингээд хоёр хүүхэд багштай хамт тойргийн гадна талаар алхана. Сүүлд шинээр нэмэгдсэн хүүхэд нь алхах явцдаа өөр нэг хүүхдийн мөрөн дээр тогшиж, “Чи бидэнтэй хамт явах уу?” гэж асууна. Ийнхүү хүүхдүүд нэг нэгээрээ нэмэгдсээр олон хүүхэд алхаж буй хүүхдэд нэмэгдэн тоглоом үргэлжилнэ. Тойргоор зогссон бүх хүүхэд дууссанаар тоглоом төгсөнө. Тоглоомын эхний хэсэгт багш хүүхдүүдийг дагуулж алхан чиглүүлж өгнө.
Гэрийн гутлан зууш [1]
Хүүхдүүд тойргоор зогсох ба багш хүүхдүүдээс гэрийн гутлаа тайлаад тойргийн голд тавихыг хүснэ. Гэрийн гутлуудыг хольж тавина. Тоглоомыг эхлэх нэг хүүхэд аль нэг гэрийн гутлыг сонгоод эзнийг нь “Энэ гутал Туяагийнх” гэнэ. Хэрэв Туяагийн гутал биш бол Туяа толгой сэгсэрнэ, мөн бол гутлаа авна. Биш бол тухайн гутлын эзнийг нь олох хүртэл өөр хүүхдүүдийг нэрлэнэ. Гутлаа авсан хүүхэд тоглоомыг үргэлжлүүлнэ.
Зөгий [2]
"Зөгий" тоглоом нь цэцэрлэгийн аль ч насны хүүхэд тоглож болох хөгжилтэй тоглоом юм. Тоглоомд бүх хүүхэд оролцох боломжтой бөгөөд харин хүүхдүүдийн тоо сондгой байна.
Эхлээд хатан зөгий хүүхдүүд (зөгийнүүдийг)-ийг “хоёр хоёроороо зогсохыг хүснэ. Дараа нь хатан зөгий бусад зөгийнүүддээ өөрийн хүссэнээрээ тушаал өгнө.
"Гараа бариарай!"
"Бүх зөгий далавчаа дэвсээрэй!"
"Бүх зөгий нугад бүжиглэе!" гэх мэт.
Хатан зөгий "Ажилсаг зөгийнүүд" гэж хэлэнгүүт “зөгийнүүд” хамт зогсож байсан найзаа орхиод өөр шинэ найзаа олно. Хамтрагчаа ололгүй хамгийн сүүлд хоцорсон “зөгий” тоглоомоос хасагдана.
Н.Норжхорлоо
Эх сурвалж:
1. Kreisspiele zur Eingewöhnung. Wir lernen uns kennen. https://www.herder.de/
2. Kreisspiele im Kindergarten: Spielanleitungen für drinnen und draußen. https://www.pro-kita.com/
Нүүр зураг:
Kreisspiele im Kindergarten: Förderung durch Spiel und Spaß. https://www.kigata.de/kreisspiele-im-kindergarten-foerderung-durch-spiel-und-spass/