Өнөөгийн бидний хэрэгжүүлж байгаа Сургуулийн өмнөх боловсролын сургалтын цөм хөтөлбөр чадамж (competence)-д баримжаалсан, хүүхэд нэг бүрийг хөгжүүлэхэд чиглэсэн, хүүхдийн “хүн болж төлөвших”-өд түлхүү анхаарсан, багшаас шинэлэг арга барилыг шаардсан, цэцэрлэгүүд бие даан хэрэгжүүлэх хөтөлбөр.
Бид Дорнод аймгийн 14 дүгээр цэцэрлэгийнхэн. Манай цэцэрлэг гадаа талбайдаа чимэглэлийн болон жимсний мод, цэцгийн мандал, туршлагын талбай, хүлэмж, зүлэгжүүлсэн талбай зэрэг ногоон байгууламж ихтэй. Энэхүү давуу тал, онцлогтоо тулгуурлан бид байгалиар дамжуулж хүүхэд бүрийг бүх талаар нь хөгжүүлж байна.
Өмнө нь бид хүүхэд юу сурсан бэ гэдгийг үнэлдэг байсан бол одоо бидний явуулсан сургалт, бусад үйл ажиллагааны үр дүнд хүүхэд бүр ямар хүн болж байна вэ гэдгийг үнэлж байгаа нь хамгийн онцлог юм. Өөрөөр хэлбэл, хүүхэд бүрийг нэг бүрчилсэн мэдлэг, чадвараар нь бус, эзэмшсэн чадамжаар нь үнэлж байна гэсэн үг.
Хүүхдүүдэд маамуу бэлтгэж өгсөн. (Хүүхэд мөн өөрийнхөө хамгийн дуртай тоглоомыг гэрээсээ авч ирж болно.) ... Мөн унтлагын цагаар уйлагнан гиншиж, ээжийгээ санан үгүйлж байгаа хүүхдэд маамууг нь өгөхөд хажуудаа тавин тэвэрч, тайвшран унтаж байгаа нь ажиглагдаж байлаа.
Хүүхэд нэг бүрийг хөгжүүлэхийн тулд багшаас хүүхэд бүрийг таньж мэдэх өөрөөр хэлбэл, хүүхэд бүрийг оношлох чадамжтай байхыг шаардаж байна. Сургуулийн өмнөх насны хүүхэд бүрийн онцлогийг таньж мэдэх, хөгжлийн ахицыг нь үнэлэхтэй холбогдох суурь ойлголтыг авч үзье.